Montag, 15. April 2019

"Awwer saach nix!"

Auf vielfachen Wunsch und für alle, die nicht dabeisein konnten, hier der ungekürzte Originaltext der Mundart-Autorin Edith Brünnler, die uns und unsere Gäste mit diesen Versen sehr zum Lachen gebracht hat:

Aus dem Buch:
Awwer saach nix!
ISBN 978-3-96172-037-8
94 S., gebunden (Hardcover)
Preis € 12,80


















"Moin schääner Gaade"von Edith Brünnler 
Ach, wie fiehl ich mich wohl un des hot aa soin Grund,
denn die Frääd an moim Gaade, die halt mich so gsund. 
Friehr war alles voll Ukraut, des is grad so gschosse, 
doch jetz hawwisch en endlich nei alegge losse
mit Schotterstää un me Plaschdikzaun.
Ich kann eich bloß saache, es is wirklich en Traum!
Kä Bliede, an die sich Insekte verirre,
kä Biene, wu summe, kä Falter, wu schwirre,
kä Blumme, die warn mir schun immer en Graus
mit ihre knallbunte Farwe. Wie sieht dann des aus?
Nur exotische Staude in beige un in braun
harmoniern mit dem Grau vun moim Plaschdikzaun.
Jetz is alles so sauwer un ordentlich.
Ich hab en graue Daume un bin stolz uff mich.
Ganz egal, wann de nausgehscht, ob spät odder frieh,
in de Luft liggt do immer en Hauch vun Chemie.
Denn kummt doch noch e Ukraut un wachst mol es Moos,
mit me Spritzer Roundup kriggscht des schnell widder los.
Brennt die Sunn endlich runner, ich waad jo schun druff,
dann heizen die Stää sich so wahnsinnisch uff,
dass sich moi afrikanische Gräser verbiege.
Do traut sich kän Voggel mehr driwwer zu fliege.
Un vor lauder Abscheu hot vor e paar Woche
en Iggel bei uns in die Oifahrt gebroche.
Es fliehen selbscht Eichhärncher, Schnecke un Grille.
Mittlerweile hab ich einen Garten der Stille.
Un seit derre Zeit bin ich nie mehr allää.
Jedi Woch is e Demo vum B-U-N-D,
vum NABU, vum Tierschutzbund, vum WWF;
ich hätt niemols geglaabt, wen ich do alles treff.
Selbscht die Männer vun Greenpeace stehn manchmol vorm Haus.
Die simmer am liebschde, weil die sehn so gut aus.
Aa en Regisseur hot moin Gaade schun gsehe,
der mecht dort demnägscht mol en Horrorfilm drehe.
Der Titel soll hääße: „Das steinerne Graue“.
Do braucht er noch net mol Kulisse zu baue.
Moi Nochbarn, die roden schun eifrisch ihr Hecke,
um ihr Gäärde mit Folie un Stää zu bedecke,
denn erscht wann de letschde Plaschdikzaun steht,
sin Biene un Blumme vum Winde verweht.
Die Nadurschitzer määnen, des wär e Verbreche
un der ganze Frevel würd sich änes Daachs räche.
Mir deeden schun merke, was uns dodurch noch blieht.
Doch ich war letschdens erscht im Nadurschutzgebiet.
Do sin Biene gflooche, s warn mindeschdens drei,
un alle paar Daach schwirrt e Hummel vorbei.
Vor me Monat, des hänn se im Fernseh berichtet,
hätt mer morgens am Weiher e Amselpaar gsichtet
un zwää Schmetterling, wu im Sunneschoi danze.
Fer was soll ich do noch moin Gaade bepflanze?!
Ich kann die ganz Uffregung gar net verstehe.
Odder hawwisch vielleicht irgendwas iwwersehe?



Die Homepage von Edith Brünnler lohnt unbedingt einen Besuch, hier gibt es viel zu  erfahren über News, Lesungen, Bücher, Preise...

  http://edith-bruennler.de



Edith Brünnler
E-Mail: bruennler@hotmail.com